Тураў - Ляскавічы

Тураўскі краязнаўчы музей з'яўляецца натхняючым вынікам зацятасці і любові да сваёй радзімы, яе гісторыя і культуры двух выдатных людзей - настаўніка геаграфіі і бібліятэкара. Сёння музей мае чатыры экспазіцыйных і адну выставачную залу: старажытнасці, этнаграфіі, Вялікай Айчыннай вайны і прыроды, а таксама музейную экспазіцыю «Старажытны Тураў», якая знаходзіцца на гарадзішчы Старажытнага горада Тураў. Тураў – горад, які ўпершыню згадваецца ў «Аповесці мінулых гадоў» у 980-м годзе. І хто ведае, колькі яшчэ да таго гадоў жылі тут людзі. Верагодна не ведае ніхто, а вось важкія здагадкі робяць археолагі. Дзякуючы іх карпатлівай працы створана ўнікальная археалагічная экспазіцыя і знойдзены падмурак самага вялікага храма трох княстваў: Тураўскага, Полацкага Смаленскага. Падчас экскурсіі Вы пазнаёміцеся з легендамі сівой даўніны, убачыце падмурак старажытнага Кафедральнага сабора і саркафагі, вывучыце прадметы культуры і побыту былых часоў.

Знаёмства з гісторыяй старажытнага горада мае сэнс пачаць з месца, дзе ўзнікла жыццё гэтых зямель і дзе з'явіліся першыя яго ўмацаванні. Памяць пра тыя часы захоўвае велічнае гарадзішча старажытнага Турава. Яно заняло ганаровае месца на маляўнічым беразе Прыпяці. Мноства выбітных археолагаў вывучалі, што захоўвае зямля гарадзішча. А захоўвае яна руіны замка з магутнай абарончай вежай, падмуркі найстаражытнага храма і мноства прадметаў побыту, якія склалі займальную экспазіцыю археалагічнага музея. Тут жа, на гарадзішчы, узвышаецца помнік чалавеку, які пакінуў глыбокі след не толькі ў гісторыі горада, але і ў гісторыі культуры ўсяго славянскага свету – «Залатавусту» XII стагоддзя Кірылу Тураўскаму.

Адзіная захаваная ў Тураве царква – Усіх Святых - не застаецца без увагі вандроўцаў. Помнік драўлянага дойлідства XIX стагоддзя. У якасці аб'екта гісторыка-культурнай спадчыны яна ўлучана ў Дзяржаўны спіс гісторыка-культурных каштоўнасцяў Рэспублікі Беларусь. З дня заснавання і дасёння тут здзяйсняюцца набажэнствы. Без сумневу, цікавая яе гісторыя, але не менш цікавая і сучаснасць. А ў сучаснасці, тут захоўваецца адзін з каменных крыжоў. Паводле легенды, прыплылі яны ў Тураў з Кіева – супраць плыні па Дняпры і Прыпяці. А адбылося гэта ў год Вадохрышчы Русі князем Уладзімірам. Дакрануцца да гісторыі і ўведаць падрабязнасці іх легендарнага з'яўлення Вы зможаце падчас экскурсіі.

Даўнейшыя Барысаглебскія могілкі размясціліся на невялікім узвышшы, аточаным балотамі, зусім недалёка ад горада Турава. Сюды хрысціяне едуць не толькі з усёй Беларусі, але і з розных краін замежжа. Што ж іх вабіць? Гэта зусім не сакрэт. Едуць яны пакланіцца цудадзейнаму «жывому» крыжу, што расце з зямлі. Многія паломнікі, якія пабывалі тут, паўтараюць пра вылячэнне і цудадзейныя ўласцівасці каменнага крыжа. А жыхары Турава кажуць, што ён цяпло выпрамяняе і расце прыкладна на 2 сантыметры ў шырыню і ў вышыню штогод. Ці верыць гэтаму? Справа ваша. Аднак мы прапануем адправіцца ў Тураў і глянуць на дзіва сваімі вачыма.

Беларускае Палессе – вабны край, што кліча да сябе. Этнаграфічны рэгіён, што ўлюбляе ў сябе кожнага, хто пабываў тут хоць раз. Тут гісторыя, што захавалася паўсюдна, зачараванне «закінутых» у часе вёсак. Вы акунецеся ў царства прыроды – узбярэжжа Прыпяці адкрые пагляду бязмежны абшар лясоў, балот і воднай роўнядзі. З усім, што Вы не ўбачыце сваімі вачыма, пазнаёмяць уважлівыя экскурсаводы музея прыроды і побыту ў мястэчку Ляскавічы. Вялікая экспазіцыя адкрые таямніцы багатага жывёльнага і расліннага свету. А таямніцы спрадвечна Палескага побыту адкрыюцца ў тэматычнай зале этнаграфіі Палескага краю, у «доме Палешука» і ў зале археалогіі.