Кастусь Качан - адзін з лепшых мастакоў-пейзажыстаў рэспублікі, чые працы захоўваюцца ў Нацыянальным мастацкім музеі Рэспублікі Беларусь, Музеі сучаснага выяўленчага мастацтва Рэспублікі Беларусь, мностве іншых музеяў Беларусі і замежжа, у прыватных галерэях па ўсім свеце (Германіі, Чэхіі, ЗША, Кітаі, Турцыі, Мексіцы і інш.). Мастацтвазнаўцы заслужана называюць Кастуся Качана песняром беларускіх мястэчак.
У трохпавярховым будынку карціннай галерэі, выкананым у стылі традыцыйнай шляхецкай сядзібы, знаходзяцца дзве выставачныя залы, а таксама майстэрня. Тут можна палюбавацца зачаравальнымі сваёй спакойнай прыгажосцю краявідамі і нацюрмортамі Кастуся Качана. Таксама тут знаходзяцца экспанаты шклозавода «Нёман», старадаўняя мэбля і прадметы побыту.
У галерэі праводзяцца экскурсіі і майстар-класы, творчыя мерапрыемствы, тут можна выпіць кавы пад жывую музыку, набыць на памяць паштоўкі і рэпрадукцыі.