Лагойскі гісторыка-краязнаўчы музей ім. К. і Е. Тышкевічаў

Лагойскі гісторыка-краязнаўчы музей ім. К. і Е. Тышкевічаў - першы ў Беларусі музей, адкрыты для шырокай публікі. Створаны ў 1842 годзе ў Лагойску ў радавым маёнтку графамі Тышкевічамі. У 2003 годзе традыцыі музейнай справы, закладзеныя Тышкевічамі, былі працягнуты, быў набраны калектыў рабочай групы па стварэнню музея. Сёння ў музеі дзейнічае 3 залы, агульнай плошчай 259 м2 з 7828 музейных прадметаў (5920 - асноўнага фонду, 1908 - навукова-дапаможнага на 2009 год).

Музей узнагароджаны дыпломамі за перамогу ў абласным аглядзе-конкурсе дзяржаўных музеяў вобласці, прысвечаным 60-годдзю вызвалення Беларусі, за ўдзел у міжнароднай экспедыцыі "Шляхам Тышкевіча", за захаванне лепшых узораў народнага ткацтва, за перамогу ў раённых спаборніцтвах 2008 года сярод устаноў культуры. Лагойскі музей актыўна ўдзельнічае ў культурным жыцці раёна: раз у месяц праводзяцца прэзентацыі часовых выстаў, гісторыка-краязнаўчага клуба "Спадчына", супрацоўнікамі музея вядзецца актыўная праца па зборы і апрацоўцы матэрыялаў па тэме "Славута род Тышкевічаў", даследчыя экспедыцыі па раёне для вывучэння фальклорнага спадчыны Лагойшчыны, артыкулы ў мясцовай газеце "Родны край".