Любчанская царква Св. Іллі

Царква Св. Іллі пабудавана з цэглы ў 1910-1914 гадах на месцы згарэлага драўлянага храма. Помнік архітэктуры рэтраспектыўна-рускага стылю.
Асновай падоўжана-восевай кампазіцыі храма з’яўляецца кубападобны аб’ём малітоўнай залы, накрыты 4-схільным дахам з цыбулепадобнай галоўкай у завяршэнні. Да яго далучаны прытвор, завершаны вежай-званіцай і паўкруглай апсідай. Фасады расчлянёны вузкімі арачнымі аконнымі праёмамі ў ліштвах у форме какошнікаў. Галоўны ўваход аформлены магутным арачным парталам пад 2-схільным пакрыццём.