Траецкі касцёл у мястэчку Відзы

Траецкі касцёл у Відзах быў пабудаваны ў перыяд з 1909 па 1914 год. Да гэтага, яшчэ ў 1481 годзе, на месцы Траецкага касцёла быў узведзены жаночы манастыр і бальніца пры ім. Амаль уся тэрыторыя мястэчка знаходзілася ў валоданні каталіцкага біскупа, з-за чаго і звалася яна «біскупскім ключом». Жыхары біскупскага ключа плацілі ўстаноўленыя падаткі не свецкай уладзе, а ўладзе духоўнай. Такім чынам бальніца і школа пры манастыры ажыццяўлялі сваю дзейнасць як за кошт дабрачынных ахвяраванняў гараджан, так і за кошт гэтых падаткаў.

У 1867 манастыр быў разрабаваны, і неўзабаве будынак храма прыйшоў у заняпад. Аднак у 1909 архітэктар Вацлаў Міхневіч пачаў працу над стварэннем новага храма ў неагатычным стылі, і ўжо ў 1914 знакаміты сёння на ўсю Беларусь касцёл адкрыў свае дзверы для вернікаў.

За гады Першай сусветнай вайны касцёл быў моцна разбураны, але ў 20-я гады сіламі мясцовага насельніцтва і мецэнатамі адноўлены. У памяць аб ахвярах Першай сусветнай у сценах храма былі замураваныя пакінутыя пасля абстрэлаў снарады. Таксама храм быў пашкоджаны і ў ходзе Другой сусветнай вайны. Праз гады Савецкія ўлады арганізавалі ў касцёле склад, збожжасховішча, пазней - спартзалу. У 1989 годзе храм перадалі вернікам, пасля чаго пачалася працяглая рэстаўрацыя будынка, якая завяршылася толькі ў 2015 годзе.