Траецкая царква ў в. Старыя Пяскі

Траецкая царква ў в. Старыя Пяскі, Бярозаўскага раёна, Брэсцкай вобл. пабудавана ў 1827 г. з дрэва на месцы згарэлай царквы.

Адназрубны прастакутны ў плане аб'ём пераходзіць у трохкантовую апсіду. Вальмавае пакрыццё апсіды з'яўляецца працягам двухсхільнага даху асноўнага аб'ёму. Над галоўным фасадам у дах урэзана аднаярусная чацверыковая званіца з васьмікантовым шатром, завершаным верхавінай. У цэнтры дах праразае 2-ярусны васьмярык з кантаваным цыбульным купалам.

У 1986 г. царква была абноўлена. Перад уваходам на цагляных асновах зроблены паветка з мініяцюрнай верхавінай на каньку двухсхільнага пакрыцця. Пабеленыя акантурныя элементы, вертыкальныя сцяжкі, простыя ліштвы прастакутных і спічастых аконных проймаў надаюць пабудове графічны геаметрызаваны характар, што падкрэслівае таксама шалёўка - вертыкальная ў фасадах і гарызантальная ў надбудовах. У агульны аб'ём цэрквы ўпісаны невялікі бабінец з бакавымі памяшканнямі і галерэяй хароў над імі. Драўляны 2-ярусны іканастас(1878 г.)адлучае ад залы прастору апсіды.
Царква з'яўляецца помнікам народнага драўлянага дойлідства.