Мінская Свята-Аляксандра-Неўская царква

Свята-Аляксандра-Неўская царква - помнік архітэктуры рэтраспектыўна-рускага стылю. Пабудавана ў 1896-98 гадах на Вайсковых могілках як храм-помнік у гонар перамогі ў руска-турэцкай вайне 1877-78 года.

Храм каменны, крыжова-купальны, трохнефавы з пяціграннай апсідай. У дэкоры - какошнікі, фрызы, разеткі, вуглавыя калонкі. Пры ўваходзе ў прытворы знаходзяцца дошкі з імёнамі 118 воінаў-беларусаў 30-й артылерыйскай брыгады і 119-га Каломенскага палка, якія гераічна загінулі пад Плеўнай ў Балгарыі. За алтарнай сцяной знаходзяцца пахаванні вышэйшых афіцэрскіх чыноў і 2 брацкія магілы воінаў.