Cуботненская Царква Раства Багародзіцы

Субботненская Царква Раства Багародзіцы размешчана ў цэнтры в. Суботы, Драгічынскага р-на, Брэсцкай вобл., Рэспублікі Беларусь. Яна была пабудавана ў 1797 г. з цэглы.

Да прастакутнага ў плане асноўнага аб'ёму, накрытаму двухсхільным дахам, прылягае трохкантовая апсіда. Дах каранаваны 2 васьмікантовымі драўлянымі барабанамі з частачкамі. Сцены з вялікімі паўцыркульнымі аконнымі проймамі раскрапаваны ў міжаконнях пілястрамі. Фрыз антаблемента раскрапаваны выступамі адпаведна пілястрам. Пластыку галоўнага фасада, завершанага драўляным франтонам з вертыкальнай ашалёўкай, дапоўнена паўцыркульнымі нішамі з конхамі. Усярэдзіне асноўнай аб'ём перакрыты драўлянай столлю на бэльках з невялікімі падугамі. Над уваходам - трапецыяватыя ў плане хары.
Царква з'яўляецца помнікам архітэктуры класіцызму.