Рэзідэнцыя Дзеда Мароза размешчана ў глыбіні пушчы ў асяроддзі запаведнага лесу на былым зубрагадавальніку, куды раней зімой прыходзілі карміцца зубры. Агульная плошча маёнтка складае 15 гектараў. Рэзідэнцыя ўключае непасрэдна маёнтак Дзеда Мароза з троннай залай і кабінетам на першым паверсе, спальняй і балконам — на другім. На ганку свайго жылля гасцей сустракае сам Дзед Мароз са сваёй унучкай Снягуркай. Крыху сціплей убаку стаіць аднапавярховая хатка Снягуркі. Маецца «Скарбніца» - сховішча падарункаў, а таксама лістоў, малюнкаў, фатаграфій і вырабаў, дасланых дзецьмі Дзеду Марозу. Тут жа музей Дзеда Мароза, у якім сабраны прадметы даўніны.
На ўваходзе гасцей сустракаюць два драўляныя рыцары — Дуб-Дубовіч і Вяз-Вязовіч. На тэрыторыі рэзідэнцыі пабудаваны вятрак, чароўная студня і шэраг іншых казачных аб'ектаў. Тут маецца сажалка, у якой плавае Царэўна-жаба. Рэзідэнцыю ўпрыгожваюць шматлікія скульптуры герояў казак - Бураціна, шчупак, казёл, заяц, мядзведзь і іншыя. У маёнтку ўстаноўлены скульптурныя групы і кампазіцыі з дрэва па матывах казак "Беласнежка і сем гномаў" і "12 месяцаў". Кожны месяц мае выяву адпаведнага яму знака гараскопа. Па паданні, калі дакрануцца да свайго месяца і загадаць жаданне, тое яно абавязкова спраўдзіцца.
