Музей гісторыі пасёлка Ільіч

Музей гісторыі пасёлка Ільіч быў ператвораны з школьнага музея Ў.І.Леніна (створанага ў 1963 годзе), на падставе ліста міністэрства Культуры БССР, ліста ўпраўлення культуры і распараджэнні гарвыканкама ў 1989 годзе. Першапачаткова філіял знаходзіўся ў адным пакоі і калідоры школы плошчай 150 м.кв.

У 1990 годзе Рагачоўскаму музею Народнай славы былі перададзеныя сабраныя Ільлічоўскай сярэдняй школай матэрыялы па гісторыі школы і пасёлка Ільіч. Пачалося будаўніцтва будынка для размяшчэння філіяла музея, які пасля размясціўся на тэрыторыі школы пасёлка Ільіч Рагачоўскага раёна. Будынак быў здадзены ў эксплуатацыю ў 1992 годзе, затым пачалася праца па стварэнні экспазіцыі філіяла музея ў пабудаваным памяшканні, афармляліся залы: "Этнаграфія і побыт", "Гісторыі фабрыкі першаснай апрацоўкі воўны", "Гісторыі Ільлічоўскай школы". У кастрычніку 2014 філіял музея адзначыў 25-годдзе з дня адкрыцця.