Свята-Мікалаеўская царква ў в. Добрамысль

Свята-Мікалаеўская царква была пабудавана з цэглы ў 1874 году па тыпавым праекце на ўскраіне вёскі. Храм падоўжна-восевай кампазіцыі, у якую ўваходзяць двух'ярусная званіца, прастакутныя ў плане трапезная, папярочны асноўны аб'ём і апсіда. Сферычны купал званіцы і двухсхільны дах асноўнага аб'ёму завершаны цыбульнымі галоўкамі на васьмігранных барабанах. Фасады прарэзаны арачнымі аконнымі праёмамі ў плоскасных руставанай ліштве. У дэкоры фасадаў выкарыстаны прастакутныя філёнгі, зубчастыя фрызы, прафіляваныя карнізы. Зала храма аддзелена ад апсіды двух'ярусным драўляным іканастасам.