У паўночна-ўсходняй частцы парку знаходзіцца магіла савецкіх ваеннапалонных, падпольшчыкаў і мірных жыхароў. Тут пахавана больш за 10 тысяч чалавек, расстраляных нямецка-фашысцкімі захопнікамі ў гады вайны. У 1955 годзе на магіле ўстаноўлены помнік - скульптура жанчыны ў смутку. У парку размешчаны атракцыёны, летняя эстрада, танцавальная пляцоўка.
У цяперашні час парк з'яўляецца адным з цэнтральных паркаў горада Мінска і мае статус гісторыка-культурнай каштоўнасці, як помнік гісторыі і ландшафтнай архітэктуры. Тут расце каля 22 тыс. дрэў, у асноўным гэта ліставыя і іглічныя пароды. Па ўсёй тэрыторыі ўздоўж асноўных алей пасаджаны дэкаратыўныя віды (каштан, ліпа, клён, бяроза, рабіна, елі і інш).
