Першапачаткова гэта была маленькая драўляная праваслаўная царква, пабудаваная яшчэ ў 1567 г. на невялікім узвышшы на ўскраіне вёскі. У 1764 г. яна ўжо згадваецца як уніяцкая. Першым уніяцкім святаром Свята-Дзмітрыеўскай царквы быў сын уніята-святара Іаана Кургановіча.
Пасля падзелу Рэчы Паспалітай в. Тэўлі ўвайшла ў склад Расійскай імперыі. Новай уладай было вырашана пабудаваць у вёсцы праваслаўную мураваную царкву. Закладзена яна была ў кастрычніку 1872 г. у дзень памяці Святога велікамучаніка Дзмітрыя. У 1874 г. храм быў дабудаваны і асвечаны ў Свята-Успенскую царкву, а старая драўляная царква была перанесена на могілкі.
Так ў 1881 г. на мясцовых могілках з'явілася Свята-Дзмітрыеўская капліца. Яна функцыянавала і падчас Першай сусветнай вайны, і падчас фашысцкай акупацыі ў перыяд Вялікай айчыннай вайны. У Савецкі перыяд яна была зачынена і выкарыстоўвалася як склад запчастак для с/г тэхнікі. У 80-я гады дзякуючы садзейнічанню настаяцеля Свята-Успенскай царквы айца Аляксандра, прыхаджан і Тэвельскага сельсавета пачалася рэканструкцыя капліцы. З 2007 г. тут праводзяцца набажэнствы.