Аб”ёмна-прасторавае рашэнне палаца з”яўляецца арыгінальным для беларускага сядзібнага дойлідства першай паловы XIX стагоддзя. Гэта ўзор архітэктуры класіцызму перыяду яго росквіту. Палац Войніч-Сенажэцкіх ўяўляе сабой двухпавярховы будынак. Яго першы паверх выкананы з цэглы, другі - з дрэва. Аднак архітэктурнае рашэнне усяго палаца стварае ўражанне, што будынак цалкам збудаваны з каменя.
Калісьці на першым паверсе сядзібы Войніч-Сенажэцкіх размяшчаліся бібліятэка, архіў, дзве спальні і пакоі для гасцей, а таксама прасторная сталовая з камінам. Яе сцены былі выкладзены драўлянымі панэлямі, над якімі віселі фамільныя партрэты. Шкляныя дзверы з сталовай вялi на ніжнюю тэрасу. На другі паверх палаца Войніч-Сенажэцкіх можна было трапіць па драўлянай лесвіцы. Там размяшчалася вялікая светлая бальная зала. Як мяркуюць гісторыкі, яго паталок і сцены ўпрыгожваў вытанчаны дэкор. Гонарам гаспадароў сядзібы былі вытанчаныя банкеткі ў стылі Людовіка XVI, старадаўняя мэбля з чырвонага дрэва, каштоўная радавая бібліятэка, калекцыі дываноў, срэбра, фарфору, карцін і малюнкаў вядомых мастакоў таго часу. На другім паверсе таксама знаходзіліся салон, спальныя пакоі і кабінет ўладальнікаў сядзібы, а таксама прыбіральні і гардэробныя пакоi.
Галоўны фасад палаца Войніч-Сенажэцкіх, арыентаваны на раку Сож, складаецца з шасці калон, на якія ў сваю чаргу абапіраюцца калоны другога паверха. У яго цэнтры знаходзіцца акружаная каланадай паўцыркульная тэраса з балконам, размешчаным над ім.
Перад галоўным фасадам палаца размяшчаецца шырокі адкрыты двор з газонам і фантанам. Па баках ад яго калісьці знаходзіліся два ідэнтычных аднапавярховых флігеля з чатырохкалоннымi порцікамі. На значнай адлегласці ад палаца знаходзіліся ўязныя вароты (брама), да якіх вяла алея. Злева ад яе размяшчаліся гаспадарчыя будынкі.
Побач з сядзібай ў XIX стагоддзі размяшчаўся шырокі пейзажны парк. Яго перасякаў шырокі яр, дзе працякаў ручэй, якi ўпадае ў Сож. Недалёка ад сядзібы таксама быў разбіты вялікі фруктовы сад, да якога з параднай часткі палаца вёў перакідны падвесны мост.