Плошча пачала афармляцца ў першай палове XIX стагоддзя. Яна мае форму трыкутніка і забудавана ў асноўным двухпавярховымі дамамі. Калі горад уваходзіў у склад Расійскай імперыі, гэта плошча была яго адміністрацыйным цэнтрам. У 1913 г. тут размяшчаліся гарадская дума і ўправа, ратуша, публічная бібліятэка-чытальня імя Н.В. Гогаля, працавалі суддзя і агент страхавога грамадства.
На плошчы ў 1965 г. усталяваны помнік у гонар войскаў I Беларускага фронту, якія вызвалілі горад ад нямецка-фашысцкіх захопнікаў. Некалькі гадоў таму была праведзена рэканструкцыя плошчы, якая стала любімым месцам адпачынку гараджан.
