Гісторыя развіцця
Бярозаўка - малады горад, які ўзнік у канцы XIX ст. Заснаванне горада было з звязана з адкрыццём некалькіх гут. Першымі гутамі ў Беларусі здаўна называлі шкляныя майстэрні. Першая майстэрня адкрылася ва ўрочышчы Устронь яшчэ ў 1875 г. Пазней, ў 1883 г. пачала працу гута ва ўрочышчы Бярозаўка. Гаспадаром шкляной вытворчасці ў Бярозаўцы быў мясцовы памешчык Зянон Ленскі. Праз некаторы час завод Ленскага ўзялі ў арэнду два майстры: Вільгельм Краеўскі і Юліўс Столе. Спачатку Краеўскі і Столе хацелі выкупіць завод, але Зянон Ленскі не пагадзіўся на гэтую прапанову. Тады майстры адкрылі новы завод на паравой цяге ў тых жа месцах (1896 г.). З таго моманту пачалося актыўнае развіццё як новага завода, так і горада. C 1908 г. завод называецца «Нёман».
Па выніках Рыжскага мірнага дагавору 1921 г., заключанага паміж РСФСР і Польшчай, Бярозаўка ўвайшла ў склад апошняй. З пачаткам Другой Сусветнай вайны (1939 г.) Бярозаўка, як частка Заходняй Беларусі, увайшла ў склад БССР. З 1940 г. горад уваходзіў у склад Наваградскага раёна. У час Вялікай Айчыннай вайны (1941-1944 гг.) Бярозаўка была акупаваная гітлераўскімі войскамі. У горадзе маецца мемарыял, усталяваны ў памяць больш чым 200 ваеннапалонных, расстраляных фашыстамі ў 1941 г.
У пасляваенны перыяд горад аднаўлялі нанова. У першую чаргу быў адбудаваны знакаміты шкляны завод. Сёння Бярозаўка - сучасны горад з развітай вытворчасцю.
Турыстычны патэнцыял
Нягледзячы на тое, што Бярозаўка дастаткова малады горад - ён валодае некаторым турыстычным патэнцыялам. Ні адзін турыст, які наведвае горад, не абыходзіць сваёй увагай знакамітую вытворчасць - шкляны завод «Нёман». Сёння «Нёман» - гэта сучаснае прадпрыемства па вытворчасці вырабаў з крышталя і шкла з разнастайнымі відамі дэкарыравання, прадукцыя якога пастаўляецца ў краіны блізкага і далёкага замежжа - у Расійскую Федэрацыю, Літву, Германію, Францыю, ЗША і г.д. На заводзе рэгулярна праводзяцца экскурсіі, якія знаёмяць наведвальнікаў з гісторыяй вытворчасці шкла ў Бярозаўцы, а таксама з працэсамі і этапамі стварэння прадукцыі. На свае вочы можна ўбачыць як бясформенная нарыхтоўка ператвараецца ў вытанчаны выраб.
Акрамя вытворчых экскурсій, у Бярозаўцы можна наведаць Храм Сашэсця Святога Духа. Унікальнай асаблівасцю гэтага храма з'яўляюцца набажэнствы, якія праходзяць пад акампанемент духавога аркестра шклозавода. Штогод у горадзе праходзяць маштабныя гулянні, прысвечаныя дню нараджэння шклозавода. Турысты, якія наведваюць Бярозаўку, любяць гэтае месца не толькі за гістарычныя помнікі і вытворчасць, але і за жывапісную прыроду. Атрымаць асалоду ад прыгажосцяў р. Нёман можна падчас сплаву на байдарках, а адпачынак у адной са шматлікіх сядзібаў раёна падорыць станоўчыя эмоцыі і прыемныя ўражанні.
